Eng Technik fir jiddereen
D’Kierperreaktioune bei Stress sinn ähnlech bei deene meeschte Mënschen. An eng natierlech Stressregulatioun funktionéiert usech och ähnlech. Esou datt dës Übunge super si fir jiddereen, egal ob autistesch oder net autistesch, gestresst oder einfach just heiansdo opgereegt.
Besser Liewensqualitéit – Maach mat!
Ech kann dës somatesch orientéiert Übunge wierklech vun Häerzen empfielen! Si erméigleche mir ze pauséieren, wann ech lasspoltere wëll. Si zentréiere mech a gi mir Orientéierung, wann ech vun intensiven Emotiounen iwwerschwemmt ginn. Si hëllefe mir all Dag, Stress an Uspanung lasszeloossen oder zumindest e gutt Stéck ze reduzéieren.
Schwieregen Ëmgang mam stressegen Alldag
Stress an intensiv Emotioune waren alldeeglech Begleeder fir mech, besonnesch virun der Diagnos an den Hëllefstellungen. Ech hunn du sou meng Kompensatiounsstrategien entwéckelt fir domadder eenz ze ginn. Ma den Ëmgang mat stressege Situatiounen ass schwiereg bliwwen.
Op Wëssenschaft baséierend Übungen
2021 hunn ech dunn d’Päiperleks-Rees vum Kati Bohnet kennegeléiert. Seng somatesch orientéiert Übunge baséieren op der Aarbecht vum Stephen Porges, Peter Levine an Gina Ross. Weider Informatiounen dozou setzen ech spéider heihin.
Freed a Sécherheet als Resultat
Säit där Entdeckung an der Fortbildung zur S-O-S-Trainerin am Joer 2022 notzen ech déi Übunge regelméisseg. Si sinn einfach, praktesch a virun allem wierksam. Op eng koordinéiert, spilleresch an entspaanten Aart a Weis kann ech esou séier mäin Nervesystem reguléieren, sou datt ech mech erëm sécher a frou spieren, mech orientéiere kann a sozial oppe sinn.
D’Übunge kenneléieren a Fortbildungen
A menge Fortbildungen integréieren ech dacks eng Auswiel vun Übungen, einfach well se sech super eegnen zur Stressregulatioun. Och ginn ech Hannergrondinformatioune weider zum autonomen Nervesystem. E Verständnes dovunner hëlleft, d’Übunge geziilt an ugepasst u stresseg Situatiounen unzepassen.
Workshop fir Kanner a Bezuchspersounen
De Familljen-Center, d’Cité Bibliothéik (tuffi) an ech bidde puer Mol am Joer de Päiperleks-Workshop fir Kanner a Bezuchspersounen un. D’Kanner (an déi Erwuessen) entdecken d’Geschicht vum Jona mat den Übungen an eng Rei aner Aktivitéiten zur Stressregulatioun. De Workshop ass méiglech op Lëtzebuergesch, Däitsch, Franséisch an Englesch. En ass net spezifesch fir autistesch Mënschen.
Hei gesäis du och e flotte Video vun engem Workshop fir en Androck vun den Aktivitéiten an der Atmosphär ze kréien. De Workshop huet ausserhalb vum autistesche Kontext stattfonnt.
D’Datumer am Joer 2024 leeë mir nach fest. Wann s du interesséiert bass, informéiert ze ginn a matzemaachen, kanns du eng E-Mail u contact(at)joannetheisen.com, info(at)familljen-center.lu oder tuffi(at)vdl.lu schécken. Du kanns och an de Familljen-Center op de 47 45 44 oder bei den Tuffi op den 47 96 27 32 uruffen.