E klenge Bericht iwwert eng rezent negativ Erfarung, aus där ech awer séier geléiert a gläichzäiteg gemierkt hunn, wat ech och mëttlerweil drop hunn a wien/wat do ass, fir mech ze ënnerstëtzen.
Wann dat eent bei dat anert kënnt
De Moien hat ech e Shooting mat enger Madamm, wou ech onfrëndlech fonnt hunn. Ech hu mech do onwuel gespuert a war no 30 Minutten erëm fort. Duerno war ech traureg an e bëssen opgewullt. Et wier flott gewiescht, wann et eng angenem a positiv Erfarung gewiescht wier. Mä bon.
Duerno si mäi Frënd an ech op de Bazar vun der Croix-Rouge gaangen. Zum Gléck – oder leider – hunn ech u meng Loop-Ouerestëpp geduecht a se agepak (leider well ech ouni wuel vill méi séier erëm d’Kéier geholl hätt). Mir hunn en Tour gemaach, et war och an deem Sënn flott, well ech den Androck hat, datt d’Leit do frëndlech waren an et gouf Villes ze gesinn. An datt alles bénévole a gespend ass, huet deem Ganzen eng extra Atmosphär ginn!
Allerdéngs waren immens vill Leit, en plus hate mir de Moment erwëscht, wou eng bekannte Perséinlechkeet, Politiker:innen, Police, Militär, Fotograf:innen a Journalist:innen do waren. Sou datt et op eemol an deem Eck wou mir stoungen immens enk ginn ass an ech net wosst, wéi ech do erëm erauskommen. Déi Madamm vum Stand war frëndlech an huet gehollef, e Lach tëscht de Leit ze fanne fir fort. Usech wollt ech e Kaddo kafen, mä ech krut net méi kloer geduecht a konnt och keng uerdentlech Entscheedung méi treffen.
Ech hu misse fort, well ech einfach gemierkt hunn, wéi ech immens granzeg a genervt gi sinn. Mäi Frënd versteet dat gutt an huet séier mat „Ok, mir ginn.“ reagéiert. Natierlech hätt hien och nach kéinte bleiwen, hätt hien dat gewollt. Dobaussen hunn ech e puer Mol geflucht „Dat do war dat lescht!!“ An an deem Moment war ech och dovunner iwwerzeegt, datt et déi leschte Kéier wier, datt ech op dee Bazar goe géing.
Grenzen erweideren, Grenze respektéieren
Heiansdo probéieren ech nei Situatiounen aus a mierken dann, datt ech dat net hikréien. Och wann ech meng Komfortzon vill erweidert hunn a méi Kompetenzen erworben, fir mat intensiven Emotiounen, sozial Interaktiounen a sensoresch Reizer eenz ze ginn, bleiwe verschidde Grenzen. Mäin Nervesystem ännert sech net am Sënn vun e gëtt manner sensibel oder manner autistesch. Dat frustréiert a faszinéiert mech heiansdo.
No enger Zäit doheem konnt ech erëm opootmen a laachen. Et war einfach Pech. Do waren e puer Elementer beienee komm, déi ech net virausgesinn hat a mäin Nervesystem méi taxéiert haten, wéi geduecht. Wéi ech se eenzel bemierkt hunn, hunn ech och net alarméiert dorop reagéiert. An dobäi net bemierkt, wéi se sech geheeft hunn.
Op Ressourcen a Strategien zréckgräifen
Ech wëll nei Situationen net onbedéngt vermeiden. Allerdéngs gouf mir hei nach eemol ganz kloer bewosst, wéi wichteg verschidden Hiweiser vu menger Psychologin sinn: Hief e puer Fluchtpläng am Kapp. Sief am Allgemenge preparéiert. Wann eppes schif geet, wéi kanns du dech séier a méiglechst ouni Schued a Sécherheet bréngen. A Këmmer dech duerno gutt ëm dech, datt Enttäuschung, Scham, Trauregkeet an Angscht net iwwerhand huelen.
Heiansdo hëlleft och Humor. Ech mierken, wéi ech elo iwwert déi Geschicht hei grinse kann. Et war nach gutt gaangen. Och wann ech nach e bëssen erschöpft sinn a meng Informatiounsveraarbechtung nach e bësse méi lues geet.
Dëst hëlleft beim Erliewen a Veraarbechte vu schwierege Situatiounen:
- Eng Begleetpersoun, déi mech kennt a ganz spontan an entgéintkommend reagéiert.
- Eng hëllefräich a matfillend aussestehend Persoun.
- Hëllefsmaterial.
- En einfachen a séiere Fluchtwee.
- Am Nachhinein Zäit fir mech z’erhuelen.
Nächst Joer en neie Versuch
Jo, wann ech dat heiten elo esou kucken, dann denken ech, datt ech mech nächst Joer erëm op de Bazar traue wäert. Well en huet wierklech schéin ausgesinn an d’Leit ware ganz frëndlech. Vläit kann ech dann och, sollte sech eis Weeër erëm kräizen, der Perséinlechkeet frëndlech zouwénken a mäi Kaddo kafen. Amplaz fortzelafen.